ໃນຕອນເຊົ້າເວລາ 8:30 ໂມງ, ຂອງວັນທີ 04 ກໍລະກົດ 2022 ກົມສົ່ງເສີມການຄ້າ, ກະຊວງອຸດສາຫະກໍາ ແລະ ການຄ້າ ໄດ້ເປີດກອງປະຊຸມທີ່ສະມາຄົມກາເຟລາວ, ແຂວງ ຈໍາປາສັກ. ໃຫ້ກຽດເປັນປະທານຮ່ວມໂດຍ ທ່ານ ໄຊສົມເພັດ ນໍລະສິງ ຫົວຫນ້າກົມສົ່ງເສີມການຄ້າ ແລະ ທ່ານ ປອ ບຸນຍະເດດ ທອງສະຫວັນ ກໍາມະການພັກແຂວງ, ເລຂາຄະນະພັກຮາກຖານ, ຫົວຫນ້າພະແນກອຸດສາຫະກໍາ ແລະ ການຄ້າ ແຂວງຈໍາປາສັກ. ມີຜູ້ເຂົ້າຮ່ວມຈາກ ກສຄ, ພະນັກງານຈາກພະແນກ ອຄ ແຂວງຈຳປາສັກ ພ້ອມດ້ວຍຕາງຫນ້າຈາກພາກລັດ ແລະ ຫົວຫນ່ວຍທຸລະກິດ ຈາກແຂວງ ບໍລິຄຳໄຊ, ຄຳມ່ວນ, ສະຫວັນນະເຂດ,ເຊກອງ, ສາລະວັນ ແລະ ຈຳປາສັກ. ກອງປະຊຸມດັ່ງກ່າວໄດ້ເຜີຍແຜ່ຮ່າງສຶກສາທຸະກິດທີ່ມີທ່າແຮງ ເພື່ອສ້າງຄວາມເຂັ້ມແຂງ ແລະ ສົ່ງເສີມໃຫ້ເຂົ້າຕະຫລາດຕ່າງປະເທດ. ພາຍໃຕ້ໂຄງການແມ່ນໍ້າຂອງ-ແມ່ນໍ້າລ້ານຊ້າງ ໃນການປະເມີນ ແລະ ຂັດເລຶອກເອົາຫົວຫນ່ວຍທຸລະກິດ ທີ່ມີຄວາມອາດສາມາດທີ່ຈະສົ່ງອອກໄປ ສປ ຈີນ ໂດຍໄດ້ກໍານົດເອົາສາມພາກຂອງປະເທດລາວລວມທັງຫມົດ 9 ແຂວງຄື: ພາກເຫນືອປະກອບມີ 3 ແຂວງ ໄດ້ແກ່ : ແຂວງ ໄຊຍະບູລີ, ແຂວງ ຫລວງພະບາງ ແລະ ແຂວງ ອຸດົມໄຊ; ພາກກາງປະກອບມີ 3 ແຂວງ ໄດ້ແກ່: ແຂວງບໍ່ລິຄຳໄຊ, ແຂວງຄຳມ່ວນ ແລະ ແລະແຂວງສະຫວັນນະເຂດ ແລະ ພາກໃຕ້ ປະກອບມີ 3 ແຂວງ ໄດ້ແກ່: ແຂວງເຊກອງ, ແຂວງສາລະວັນ ແລະ ແລະ ແຂວງຈຳປາສັກ. ໃນກອງປະຊຸມ ໄດ້ມີການແລກປ່ຽນປະສົບການການສົ່ງອອກຈາກບັນດາຫົວຫນ່ວຍທຸລະກິດ, ຮັບຟັງບັນຫາ ແລະ ຂໍ້ສະເຫນີຕ່າງໆຈາກບັນດາແຂວງທີ່ເຂົ້າຮ່ວມໃນຄັ້ງນີ້.
